السلام عليكم ورحمة الله التعالى وبركااته
اردت في هذا الموضوع ان اقدم نصائح الى كل من هو مقدم على شهادة الباكالوريا وهذا انطلاقا من تجربتي
الخاصة.
ندخلوا في المفيد : ياك مابقالكمش بزاف على الباك شهرين مي وكان تعرفوا كي ديروا تقراو فيها تقدروا تجيبوا الباك و بمعدل مليح
نبداو بكل مادة : الاجتماعيات .الفلسفة .علوم شرعية... علابالي بلي لابليبارتي مراهمش حافضين سي لوجيك راكم مهتمين غي بالمواد الاساسية عندكم الحق مي متهملوهمش. زعما في الاجتماعيات ماشي ضروري تحفظ كلش اسيستي على التواريخ والشخصيات تضمن 12 والدروس لي راكم دايرينهم اقراوهم برك واسييوا تفهموهم بويسك الوضعية الي رياح يمدوهالكم رايحين تعبروا فيها باسلوبكم هذي في التاريخ .والجغرافيا اسيستوا على الرسومات كيما الدائرة المثلثية والبايانات وادو نموذج عن كيفيفة استقراء مع هذا انا نضمنلكم تدوا فوق 15 في الامتحان .اما العلوم شرعية ننصحكم بمطويات كليك ولا ادوا لي ريزيمي الي راهم يدوروا في النت وانتم قادرين على باش تحفضوا العلوم الشرعية في 3 ايام على الاكثر بويسك ساهلة مام في التصحيح يتهلوا فيكم قاع الي خاطي الدنيا يجيب فوق المعدل .الفلسفة علابالي بمعانتكم فيها الي يقدر يفهم يحفض غير الاقوال والفلاسفة ولا يلخص كيما درت انا العام الي فات ونهار الامتحان يبدا يوسع في الفكرة بلا مايخرج عن الموضوع هذا علاه يمدوا 3.30ساعات في الامتحان عارفين بلي الناس متقدرتش تحفض كلش ....
الفرنسية والانجليزية ...حكايتها حكاية كيما يقولوا ....
الي يعرف يعرف والي مايعرفش الله غالب مي قادرين تبروفيتوا كالك بوانت ...كيما في الفرنسية الاستعمار الفرنسي ديما كاين في الموضوع الاول اما الثاني صاديبوا ...على الاقل تعلموا الكلمات الي لازم تعرفوهم على تاريخ الجزائري الاستعمار هذي على champs lixecal ; واغلب الاسئلة تلقاوها متكرة في هذا النوع من المواضيع يامالا دبروا تصحيح تاع السنوات الماضية ...اما الانجليزية شوياساهلة على الفرنسية الى مايفهمش النص واسئلته عنده القواعد الي راكم دايرينهم في العاام لموهم في ورقة واسيوا تحفضوهم بويسك هذوك كل عام يتعاودوا ....تقدروا تجيبوا حتى 18
اما الادب العربي عندكم الاعراب هذا مفروغ منه لازم تكونوا تعرفوا تعربوا واسيستوا على اذ اذا وغيرهم من الي درتوهم
وادوا نظرت على الشعراء زعما واش هو اسلوبهم والي اي مدرسة ينتمون الي يعرف الشاعر في الامتحان راه حل 75بالملئة الموضوع وتاكدوا بلي يجي غي مي قريتوه وانا ننصح بالنسبة في الاختيار بين الشعر والنثر اذا كنتم عارفين الشعر ادوا الشعر بويسك النثر يزيروكم في التصحيح .
دروك الحقنا للصح.
الرياضيات و الفيزياء و العلوم الطبيعية
الرياضيات نجم نعذركم بويسك سامطة خاصة الي يقروا شعبة رياضيات مي لازم على الاقل تبازو ا على الدوال و المتتاليات على الاقل تضمنوا المعدل ومكانش اسهل من الهندسة في الفضاء ( مدابيكم حلوا الموضوع الثاني نتاع المات بويسك هذاك اصعب موضوع تحط في تارمينال) واما الموافقات والقسمة في زاد هدوك صاعبين شوية مي اذا حبيتوا تفهموهم كثروا من التمارين مكانش طريقة واحدخرة .اما العلمين رياضيات نتاعكم سهلة شوية نفس الاسئة دائما تتعاود كثروا من حل المواضيع توالفوها تجيكم ساهلة واسيستوا على واش تعرفوا .
الفيزياء تقريبا قاع كيف كيف ابار الاعمدة الي يقروها ماتيلام والتقني الرياضي ....الفيزياء مليحة دائما الاسئلة تتعاود في الكهرباء الاحماض والاسس الاسترة والميكانيك... انا تبان لي في كل مجال تريفيزوا 5 تمارين متنوعين تقدروا تجيبوا ريزيلتا في الباك .اما العلوم ماجات فهامة مجات حفاضة مي اتعودوا على طريقة طرح الموضوع والاسئلة واغلبية المواضيع يجيبوهالكم من الكتب القدام زعما النضام القديم لاخاترش العلوم ثابتة متتبدلش وايسيوا تحفضوا السؤال بيه بالاجابة نتاعه الله غالب والفنا هذي العقلية باش نجيبوا ريزيلتا .. اما بالنسبة الى قسم الرياضيات راهم كينين وحد المجلات تلقاو فيهم مواضيع مع الحل هدوك وكان تريفيزوهم مع امتحانات السنوات الماضية اتجيبوا لامويان في العلوم
الرياضة قاع تعرفوا تجروا هــــــــــــــــــــــــــــه
وبتوفيق للجميع ان شاء الله تفرحوا وتفرحوا والديكم قولوا اميـــــــــنـ
الي يحتاحج كانش حاجة يتصلي بي رانا في المساعدة
سمحولي على داريجة نتاعي درتها باش قاع الناس تفهم..